Тошкент шаҳрида фаолият юритувчи "Ҳунармандчилик санъати" (номи ўзгартирилган) МЧЖ раҳбари ортиқча тўланган қўшимча қиймат солиғини (ҚҚС) жамият ҳисоб рақамига қайтаришда амалий ёрдам сўраб Бизнес-омбудсман девонига мурожаат қилди.

Аниқланишича, мазкур муаммо тадбиркорнинг божсиз савдо дўконларига мўлжалланган товарларни сотиши билан боғлиқ бўлган. Солиқ кодексининг 243-моддасига мувофиқ, бундай товарларни реализация қилиш бўйича айланма ҚҚСдан озод этилади. Натижада, ушбу солиқ бўйича ортиқча тўлов юзага келган.

Бизнес-омбудсман девони аралашуви билан мазкур масала ҳал этилиб, жамиятнинг ҳисоб рақамига 1 млрд сўмдан ортиқ пул маблағи ўтказиб берилди. Шу тариқа, тадбиркорлик субъектининг мурожаати ижобий ҳал этилиб, унинг қонуний ҳуқуқлари тикланди.