Ўзбекистон Республикаси Президентининг тадбиркорлар билан навбатдаги очиқ мулоқотига тайёргарлик жараёни доирасида жорий йилнинг 25 июнь куни Бизнес-омбудсман девони ташаббуси билан хусусий олий таълим муассасалари вакиллари иштирокида учрашув бўлиб ўтди.

Онлайн форматда ўтказилган мулоқотда республикамизнинг барча ҳудудларидан 20 дан зиёд олий таълим соҳасидаги йирик тадбиркорлар фаол иштирок этдилар. Улар ўз фаолиятларида дуч келаётган муаммоларни очиқчасига муҳокама қилиб, уларни ҳал этиш бўйича қатор таклифлар билдирдилар.

Мулоқот чоғида тадбиркорлар ўқув режаларини такомиллаштириш, лицензиялаш жараёнларини соддалаштириш ва ер масалаларини ҳал этиш каби долзарб мавзуларга эътибор қаратдилар. Хусусан, улар амалдаги қонунчилик ва норматив-ҳуқуқий ҳужжатларга ўзгартиришлар киритиш зарурлигини таъкидлаб, бу ўзгаришлар хусусий таълим тизимини янада самарали ташкил этиш, бюрократик тўсиқларни камайтириш ва инвестиция муҳитини яхшилашга хизмат қилишини қайд этдилар. Тадбиркорлар томонидан илгари сурилган конструктив таклифлар соҳа ривожи учун муҳим аҳамиятга эга эканлиги эътироф этилди.